مخپاڼه / چاڼ سوي مضامین / واده کول او د واده ګټي

واده کول او د واده ګټي

لیکنه: غلام عمر عبدالله

ډېری مفسرين رحمهم الله ، د قران کريم د دغه ايات په هکله فرمايي:
وَأَنكِحُوا الْأَيٰمٰى مِنكُمْ وَالصّٰلِحِينَ مِنْ عِبَادِكُمْ وَإِمَآئِكُمْ ۚ إِن يَكُونُوا فُقَرَآءَ يُغْنِهِمُ اللَّهُ مِن فَضْلِهِۦ ۗ وَاللَّهُ وٰسِعٌ عَلِيمٌ [سورة النور ۳۲].

ژباړه:
ستاسي څخه چي كوم كسان (سړي يا ښځي) مجرد وي، او ستاسي له مینزو او مريانو څخه چي څوك نېكان وي، د هغو سره نكاح وکړئ. كه هغوى بېوزلي وي، نو الله به په خپلي مهربانۍ سره هغوى شتمن کړي. الله ښه پراختيا راوستونكى او د علم څښتن دى.

په پورته ايات کي الله تعالی له هغو فقيرانو سره د غنی (شتمنۍ ، شتمن کېدلو) وعده کړې ده کوم چي د نکاح(واده) کولو اراده لري.
ابن عباس رضي الله عنه فرمايي:
الله تعالی د نکاح(واده کولو ) امر کړی دی ، او واده ته يې هڅونه کړې ده ، او د دې امر يې کړی دی چي ازاد او مريان دي ودونه وکړي ، چي په دې سره يې د شتمن کېدلو وعده هم ورسره کړې ده.
له ابن مسعود رضي الله عنه څخه روايت دی ، چي دی فرمايي:
تاسو غنی (شتمني ، شتمن کېدل) په نکاح ( واده کولو) کي ترلاسه کړئ ، الله تعالی فرمايي:
إِن يَكُونُوا فُقَرَآءَ يُغْنِهِمُ اللَّهُ مِن فَضْلِهِۦ ۗ وَاللَّهُ وٰسِعٌ عَلِيمٌ [سورة النور ۳۲].

ژباړه:
که هغوى بېوزلي وي، نو الله به په خپلي مهربانۍ سره هغوى شتمن کړي. الله ښه پراختيا راوستونكى او د علم څښتن دى.
تفسير الطبري(۱۶۶/۱۹).

ابن کثير رحمه الله فرمايي:

رسول الله صلی الله عليه وسلم يو سړي ته په داسي حالت کي واده وکړ چي له خپل لُنګ پرته يې بل څه نه لرل ، (حتی د يوې ) اوسپنيزي ګوتۍ ( ګوتمۍ ، انګوشترۍ پر پېرلو يې ) هم توان نه لاره ، او له دې سره سره بيا هم رسول الله صلی الله عليه وسلم د نوموړي صحابي نکاح له يوې مؤمني سره وتړ او د مېرمني مهر يې دا ورته وټاکی چي نوموړي صحابي به د قران کريم هغه برخه چي د ده ياده ده خپلي مېرمني ته ور زده کړي.
الله تعالی د خپلي ژمني (او سنت مطابق) په خپل کرم او مهربانۍ سره نوموړي صحابي او صحابيې ته هغه څه ورکړل او بسنه يې پرې وشول کوم چي ( الله تعالی په واده کولو کي اېښي وه).
تفسير ابن کثير(۵۲-۵۱/۶).

(البته يو شمېر علماء کرام فرمايي : چي د داډول مهر ټاکل صلاحيت يوازي تر رسول الله صلی عليه وسلم پوري منحصر و).

ابن عاشور رحمه الله فرمايي:
الله تعالی (په واده کولو سره) له خاوند او مېرمني سره د دې ژمنه کړې ده :
که خاوند او مېرمنه:
– غريب وي شتمن به يې کړي.
– که ازاد وي نو د شتمن کېدلو لاره به ورته اسانه کړي.
– که مريي وي نو الله تعالی به د مال پراخي پر راولي تر څو ځان ازاد کړي.
التحرير والتنوير(۲۹۰۱ ص).

سعدي رحمه الله فرمايي:
تاسو بايد دا وهم او ډار له واده کولو څخه منع نه کړي چي : که تاسو واده وکړئ نو ستاسو کورنۍ به لويه شي نو تاسو به له فقر سره مخ شئ او دې ته ورته نور وهمونه.
خو د دې برعکس ( په شريعت کي) د واده کولو ترغيب (هڅونه ) راغلې ده او ( د الله له لوري خاوند او مېرمني ته په واده کولو سره له فقر وروسته د شمتن کېدلو وعده ورکړل شوې ده ).
تفسير السعدي (۵۶۷ ص).

چي دغه لاندي حديث د پورته توضيح او تشريح تائيد کوي:
له حضرت ابو هريرة رضي الله عنه څخه روايت دی فرمايي ، چي رسول الله صلی الله عليه وسلم فرمايلي دي:
درې (داسي کسان دي چي ) حقه ده پر الله تعالی باندي د هغوی مرسته : (لومړی هغه) مجاهد (چي) د الله په لاره کي وي ، (دوهم ) هغه مريی (چي له خپل بادار سره ژمنه کوي) چي (د خپل مريتوب) ازادول غواړي ، ( دريم ) هغه نکاح (واده ) کوونکی چي د پاک لمنۍ ( له زنا او نا روا څخه د خان ساتلو) اراده لري.
صحيح الترمذي.
والله اعلم.
نکته: اوس نو د سالم فکر او سليم عقل لرونکي کسان ښه قضاوت کولای شي ، اسلام چي په پاک لمنۍ ، نکاح او واده کولو کي څومره دنيوي ګټه او نېکمرغي اېښې ده ، بل هيڅ دين او نظري کي يې ساری او مثال نه شي موندل کېدلای.
او د دې برعکس په زناء او فحشاء کي د دونيا او اخرت بدمرغي پنعښتې ده.

دغه هم وګوری

دقبر دعذاب يوه عبرتناکه قصه، ديوه مړي ژوندي کېدل

دقبر دعذاب يوه عبرتناکه قصه ديوه مړي ژوندي کېدل يوه قصه چي دقبر دعذاب اړونده …